Մոսկվային բելառուսա-լեհական սահմանին միգրացիոն ճգնաժամի մեջ մեղադրողներին Ռուսաստանի նախագահ Վլադիմիր Պուտինը խորհուրդ է տվել սեփական խնդիրներին ավելի ուշադիր լինել: Այս մասին նա հայտարարել է «Մոսկվա Կրեմլ» հաղորդման ժամանակ «Ռոսիա-1» հեռուստաալիքի եթերում լրագրող Պավել Զարուբինին տված հարցազրույցում:

«Երբ մենք լսում ենք հայտարարություններ կամ մեղադրանքներ մեր հասցեին, ուզում եմ բոլորին ասել՝ զբաղվեք ձեր ներքին խնդիրներով, ոչ ոքի վրա մի բարդեք սեփական հարցերը, որոնք ձեր գերատեսչությունների կողմից ենթակա են լուծման»,- ասել է Պուտինը:

Ավելի վաղ Մեծ Բրիտանիայի ԱԳ նախարար Էլիզաբեթ Թրասը հայտարարել էր, որ Ռուսաստանը պատասխանատվություն է կրում բելառուսա-լեհական սահմանին տիրող իրավիճակի համար և Մոսկվային կոչ էր արել «ճնշում գործադրել» Բելառուսի իշխանությունների վրա՝ ճգնաժամին վերջ դնելու համար:

Ռուսաստանի արտաքին քաղաքական գերատեսչության պաշտոնական ներկայացուցիչ Մարիա Զախարովան էլ ընդգծել էր, որ Մեծ Բրիտանիան իրավունք չունի Ռուսաստանին մեղադրել բելառուսա-լեհական սահմանին միգրացիոն ճգնաժամի մեջ։

Հիշեցնենք, որ նոյեմբերի 8-ին Բելառուսում գտնվող փախստականների մեծ խումբ Մերձավոր Արևելքից և Աֆրիկայի երկրներից եկել էին լեհական սահման՝ ԵՄ տարածք մուտք գործելու համար։ Այնտեղ 3 հազար փախստական կա, այդ թվում՝ զգալի թվով կանայք և երեխաներ։ Փախստականները տարերային ճամբար են ստեղծել։