Հոկտեմբերի 9-ին «Զատիկ» երեխաների աջակցման կենտրոնում տեղի ունեցավ «Սուրբ Մայր Հայրենիք Հերոս Հաղթական» խորագիրը կրող միջոցառումը։

Ներկա էին Չեխիայի հանրապետության արտակարգ և լիազոր դեսպան Պետր Պիրունչիկը, ինչպես նաև ՀՀ աշխատանքի և սոցիալական հարցերի նախարարության ներկայացուցիչներ, հասարակական կազմակերպությունների ղեկավարներ, հերոսածին մայրեր և այլոք։   

Միջոցառման ընթացքում կենտրոնի տնօրենի ժամանակավոր պաշտոնակատար Անգելինա Արշակյանի գլխավորությամբ բացվեց բոլոր հերոսամարտերում անմահացած հերոսների հիշատակին նվիրված պուրակը։ Տիկին Արշակյանը մեզ հետ զրույցում ասաց, որ իր համար երազանքի պես բան էր կենտրոնի բակում ունենալ խաղաղության և ոգու հավերժության խորհրդանիշ հուշարձան։ Ինչպես նաև ունենալ «Հերոսներին նվիրված պուրակ», որտեղ ամեն մի հերոսի անունով տնկված ծառ կլինի։ Տնօրենի խոսքով՝ մեր օրերում շատ կարևոր առաքելություն է երեխաներին սովորեցնել հիշել և շնորհակալ լինել նրանց, ովքեր ընկան հանուն հայրենիքի: 

Անգելինա Արշակյանի նախաձեռնությամբ կենտրոնի բակում այսուհետ կգործի թոնրատուն-հացատունը, որը շարունակվող կյանքի խորհրդանիշն է։Միջոցառման հյուրերը բակում տեսան և համտեսեցին երեխաների ձեռքով աճեցրաց և պատրաստած համադամ ուտեստներ։ Ըստ տիկին Արշակյանի՝ ցանելով, տնկելով և բերք ստանալով պետք է շարունակենք ապրել և արարել հանուն կենտրոնում ապրող երեխաների և ուղղորդել նրանց ճիշտ ճանապարհով․ սիրել հայրենիքը, հողը, կյանքը․․․ Միջոցառումն անցավ շատ ջերմ մթնոլորտում։ Հնչեցին հիացմունքի և շնորհակալական խոսքեր ուղղված տիկին Արշակյանին, ով վերջին ամիսներին ջանք ու եռանդ չի խնայում և անում է ամեն հնարավորը կենտրոնին նոր շունչ հաղորդելու և երեխաներին ընտանիքի շունչ ու ջերմություն փոխանցելու համար։  

Միջոցառման ավարտին Մշակութային Հայաստան «Գայանե» ռազմահայրենասիրական միության կողմից պատվոգիր և Սուրբ Մայրապետ մեդալ տրվեց կենտրոնի տնօրեն Անգելինա Արշակյանին «Սուրբ Մայր Հայրենիք Հերոս Հաղթական» խորագիրը կրող ցերեկույթը կազմակերպելու, տարիներ շարունակ հերոսների ընտանիքների կողքին լինելու, «Զատիկ» երեխաների աջակցման կենտրոնը ծաղկեցնելու, երեխաներին սեր ու ջերմություն տալու և ներդրված մեծ ավանդի համար։ 

Ի նշան երախտագիտության և կենտրոնում ներդրած ջանքերի, նվիրյալ աշխատանքի, «Զատիկ»-ը շենացնելու համար կենտրոնի աշխատակիցները տնօրենին հանձնեցին շնորհակալագիր։ 

 Նյութը՝ Աննա Ավետիսյանի