ԱԺ «Հայաստան» և «Պատիվ ունեմ» խմբակցությունները չեն մասնակցի 44-օրյա պատերազմի հանգամանքներն ուսումնասիրող քննիչ հանձնաժողով աշխատանքներին: Տեղեկությունը հայտնում են «Հայաստան» դաշինքից։

Ընդդիմության ներկայացուցիչները պարզաբանում են, որ իրենց որոշման պատճառն այն է, որ իշխանությունները չեն կարող օբյեկտիվորեն քննել իրենց իսկ գործողությունները։ Նշվում է, որ ԱԺ պաշտպանության և անվտանգության հարցերի մշտական հանձնաժողովը` իր նախագահությամբ, որի կազմում գործելու է քննիչ հանձնաժողովը, առհասարակ զուրկ է որևէ կերպ օբյեկտիվ լինելու հնարավորությունից։

Հիշեցնենք, որ երեկ`փետրվարի 10–ին, «Քաղաքացիական պայմանագիր» խմբակցության պատգամավորների նախաձեռնությամբ ՀՀ Ազգային ժողովում քննիչ հանձնաժողով է ստեղծվել։

Թե ովքեր են ընդգրկված հանձնաժողովում, դեռ հայտնի չէ։

Հիշեցնենք, որ ՀՀ Ազգային ժողովի պաշտպանության և անվտանգության հարցերի մշտական հանձնաժողովի նախագահ, ՔՊ խմբակցության պատգամավոր Անդրանիկ Քոչարյանը դեռ 2021 թվականի հոկտեմբերին ասել էր, որ քննիչ հանձնաժողովի աշխատանքները հապաղում են «Հայաստան» դաշինքի պատգամավոր Արթուր Ղազինյանի պատճառով։ Ըստ Քոչարյանի` Ղազինյանը չի ներկայացրել գաղտնի տեղեկություններին տիրապետելու թույլտվության համապատասխան փաստաթղթերը։

Նման հանձնաժողով ստեղծելու մասին ՀՀ ԱԺ նախագահ Ալեն Սիմոնյանը հայտարարել էր նախորդ տարվա հուլիսի 26-ին։