ԵՍ` ԿԻՆ 

նախագծի հյուրն է գրող

Ծով alizé Բանուչյանը

ԵՍ... սիրում եմ ժամանակ առ ժամանակ մեռնել։ 

ԱՐԹՆԱՆՈՒՄ ԵՄ իմ ժամից շուտ, որ մի քիչ մնամ անկողնում։ 

ՎԱԶՈՒՄ ԵՄ... ոչ մի տեղ։ 

ԳՐԿՈՒՄ ԵՄ... ոչ մեկի (COVID-19): 

ՍԵՎԱԳՐՈՒՄ ԵՄ ավելի լավ, քան գրում եմ։ 

ԽԻԶԱԽՈՒՄՍ... թուլություններիցս չամաչելն է։ 

ՋՆՋՈՒՄ ԵՄ ժամանակավրեպ ամեն ինչ։ 

ԱՓՍՈՍՈՒՄ ԵՄ, որ ալարկոտ եմ։ 

ԿԱՐՈՏՈՒՄ ԵՄ պապիկիս։ 

ՀԱՎԱՏՈՒՄ ԵՄ, որ երկիրը կլոր է։ 

ԵՐԱԶՆԵՐՍ... ավելի իրական են, քան կյանքս։

***

Իրերդ միշտ թող գնալուց առաջ, 

Որ քեզ թվա, թե հետ ես դառնալու, 

Գնա միշտ ուղիղ, քայլիր միշտ առաջ, 

Որ ճամփան հիշես վերադառնալու... 

Մաքրիր սենյակը, գրքերի փոշին, 

Օծանելիքդ սիրած մի՛ վերցրու, 

Պահարանում էլ թող մի զույգ կոշիկ, 

Իսկ ժամացույցդ ինչ-որ տեղ կորցրու... 

Հեռախոսիդ թող հաղորդագրություն,

Որ երջանկության մոտ ես դու գնում, 

Երջանկությանն էլ կարճ մի գրություն, 

Ասենք նրան էլ պահակ ես թողնում... 

Տանը, քո տանը, կամ ինչ-որ մեկի, 

Որտեղ դու արդեն վաղուց չես ապրում, 

Կամ նրանց, ովքեր քո կյանքի ղեկից, 

Կողմնացույցներ են անիմաստ կապում... 

Իրերդ միշտ թող գնալուց առաջ, 

Որ թվա, թե դեռ հետ ես դառնալու, 

Գնա´ միշտ ուղիղ, քայլիր միշտ առաջ, 

Որ ճամփան հիշես վերադառնալու... 

Ծով alizé

Զրույցը վարեց Աղավնի Գրիգորյանը

Շարքը' Մշակութային փազլ ֆբ-յան էջից