Արմավիրի մարզում ոռոգման ջրի խնդիրը շարունակումէ  արդիական մնալ. Այսօր մի շումբ գյուղացիներ այցելել էին Ջրօգտագործման ընկերություններից մեկը եւ բողոքում էին, որ շարունակում են ջուր չունենալ:

ՋՕԸ այցելած գյուղացիներից մեկն իր խոսքում ասաց. «Ջրբաշխի մատյաններն ո՞ւր են: փող եմ մուծել, իմ մուծած փողերը ցույց տուր, ո՞ւր ա: Դու ինչքան փող ես ինձնից առել ու ինչքան ջուր ես տվել: Ես ասում եմ ջրբաշխին՝ ինձ ջուր տուր, ասում է՝ գնա պետից ուզի:  Դու ջրի փող ես ուզում, ինձ 5 մլն ձրի վարկ ես տվել, չտայիր էդ վարկը: Դու ես տվել, Նիկոլն է տվել, հիմա ինձ կոխել ես շիշը, վարկը ո՞նց պետք է փակեմ: Դու անձամբ չորացրել ես իմ բերքը, որովհետեւ ճիշտ չես կառավարում: Դու երեխուս հացը կտրել ես, թողեմ սիկտիրս քաշե՞մ էս երկրից: Դիմում ենք պարոն Փաշինյանին, ավելի լավ է ջուր տա, քան թե ջուր չտա, վարկ տա»:

Գյուղացիները նաեւ բողոքում էին, որ ջուրը ոչ թե լիտրով են հաշվում, այլ հեկտարով, քանի որ մեկը նույն չափի տարածքը ջրում է 12 ժամ, մյուսը 60 ժամ:

ՋՕԸ տնօրենը լրագրողների հետ զրույցում պարզաբանեց. «Իրենց հողերն այն տարածքում է, որ ջուրը հերթով է տրվում, իրենց մեջ պայմանավորվածություն կա, որ մեկն ավարտում է, մոյուսն է սկսում: Երկու օր առաջ է վերականգնվել մեր ջրամատակարարումը, 3 օր ջուր չենք ունեցել Մալաթիայում վթարի պատճառով: Երեք օրվա բացից հետո երեկվանից ջրամատակարումը ունենք, բայց այս ընթացքում բաց է ձեւավորվել, պիկ է առաջացել:  բոլորն ուզում են միանգամից ջրել, ինչը ֆիզիկապես անհնար է: Էլի հերթով ջրվելու են»:

Ինչ վերաբերում է նրան, որ դեմ մեկ ամիս առաջ էլ գյուղացիները բողոքում էին ջրի պակասից, եւ ճանապարհ էին փակել, ՋՕԸ-ի տնօրենն ասաց. «Դեռ մեկ ամիս առաջ մարդիկ ճանապարհ էին փակել, այդ ժամանակ ջրում էին սոխը ու դժգոհում, որ ջուր չունեն: Հիմա սոխը հանել են: Եթե ջուր չեն ունեցել, ո՞նց է ամբողջ ճանապարհով մեկ սոխ վաճառվում: Այլ բան է, որ որոշակի տատանում եղել է: Այդուհանդերձ, ես վերադասին խնդրել եմ, որ մի քիչ էլ ջրի չափաբաժինն ավելացնեն, որ հնարավորինս այս 3 օրվա բացը փորձենք փակենք»: