Բարեգործությունը մարդասիրության ամենավեհ դրսևորումներից է։ Ունես, բաժնեկցիր, կիսիր, ձեռք մեկնիր, աջակցիր – սա չգրված, բարոյական օրենք է, խղճի թելադրանք, որին ականջ են դնում քչերը, բայց նրանք, ովքեր լսում ու հետևողական են դառնում, բաժին է հասնում պատիվ, գոհունակություն, սեր, հարգանք ու ակնածանք։

Ռուսաստանի հայերի միության նախագահ Արա Աբրամյանը տարիներ ի վեր բարեգործական ծրագրերով եղել է մարդկանց, մասնավորապես հայ ժողովրդի կողքին՝ տարբեր նախագծերի իրականացմամբ, սոցիալապես անապահով ընտանիքներին ցուցաբերած անհրաժեշտ օգնությամբ, մշակութային կառույցների ու գործիչների նկատմամբ ունեցած հոգատար և ուշադիր վերաբերմունքով։

Այդ ամենը նա կատարել և շարունակում է կատարել անխոս, լուռ, անաղմուկ, առանց փող հնչեցնելու, որովհետև որպես սկզբունք որդեգրել է աստվածաշնչյան ճշմարտությունը, թե աջ ձեռքը չիմանա, ինչ բարիք է անում ձախ ձեռքը։ Սա է Արա Աբրամյանի գործելաոճը։ Այսպես է նա արձագանքում իր սրտի ու խղճի թելադրանքին՝ արդյունքում երջանկություն ու բերկրություն պարգևելով հարյուրավոր անտունների ու անօթևանների, կարիքավորների և ոչ միայն։

Այսպիսի հայերն արժանի են մեծ գնահատանքի։ Այսպիսի հայերն են ազգի հույսը։