Ազգային ժողովի «Քաղաքացիական պայմանագիր» խմբակցության պատգամավոր Լուսինե Բադալյանը ներողություն է խնդրել «Եռաբլուր» զինվորական պանթեոնում ծիծաղելու համար, որը նա «լայն ժպիտ» է անվանել։

«Վերջին օրերին սոցիալական մեդիայում հայտնվեց Եռաբլուրի մոտակայքում գաղտնի նկարահանված մի տեսանյութ, որտեղ ինձ մի պահ թույլ եմ տվել լայն ժպտալ մի ջերմ պատմության վրա, ինչի համար ուզում եմ ներողություն խնդրել։ Նաև ուզում եմ ներողություն խնդրել այն բանի համար, որ երբեք չէի կարող պատկերացնել, որ այդ օրը հայոց բանակը փառաբանելու և հայ զինվորին մեծարելու փոխարեն կարող են գտնվել մարդիկ և լրատվամիջոցներ, որոնք ի վիճակի են նման մանիպուլյացիաներով իրենց նպատակներին հասնելու համար խաղալ նույնիսկ մեր զինվորների ծնողների զգացմունքների հետ։ Խորապես ցավում եմ կատարվածի համար»,– Facebook–ի իր էջում գրել է նա։

Նշենք, որ պատգամավորները զինվորական պանթեոն էին այցելել Հայոց բանակի 30-ամյակի օրը։

Հիշեցնենք` Բադալյանը 2020 թվականի նոյեմբերին հայտարարել էր, որ պատրաստվում է վայր դնել մանդատը։ Սակայն ավելի ուշ հայտարարեց, որ այդ քայլին չի գնա, որովհետև անելիքներ կան։