Պարզ է, որ երբևէ գերիների մասին չխոսող կառավարությունն ու «Քաղաքացիական պայմանագիր» խմբակցությունը  գերիների վերաբերյալ հայտարարությունը չէր ընդունի, Aysor.am-ի հետ զրույցում անդրադառնալով երեկ ԱԺ-ում գերիների հարցով նախագծի ձխողմանը՝ ասաց իրավապաշտպան Ժաննա Ալեքսանյանը:

«Ես հետևում էի ԱԺ-ի այդ քննարկումներին: COP 29-ից առաջ արժեր գերիների մասով  հայտարարություն տարածել: Վերջապես, ընդդիմությունը մտածեց դա անել: Երբ ՔՊ-ական Ռուբեն Ռուբինյանը հակադարձեց, որ ընդդիմադիրները քաղաքական շահարկումներ են անում, ընդդիմությունը փորձեց ապացուցել, որ այն քաղաքական չէ: Այդ հարցը հենց քաղաքական հարց է: Ռազմագերիների վերադարձի հարցը քաղաքական հարց է, և ընդդիմությունը պետք է պնդեր դա, ոչ թե հրաժարվեր դրանից»,-նկատեց Ալեքսանյանը:

Դիտարկմանը՝ միգուցե ներքաղաքականի՞ մասին է խոսքը, քանի որ իշխանականները հայտարարում էին, որ ընդդիմությունը քաղաքական դիվիդենտներ է փորձում հավաքել գերիների հարցից՝ իրավապաշտպանն արձագանքեց. «Ես ընդդիմությանն առանձնապես չեմ առանձնացնում իշխանությունից։ Մի «ամանում են եփվում»: Սակայն, նողկալի էր տեսնել Կոնջորյանի բացատրությունը, որ իրենք  գերիների հարցով գիշեր ու ցերեկ աշխատում են: Շատ տհաճ է, չգիտես՝ ինչ ասես: Ինչքան վատ բան կա ՔՊ-ի հասցեին ասելու, արդեն ասված է:

Պարզ է, որ իշխանությունը պետք է հրաժարվեր այդ հարցի քննարկումից, քանի որ մենք չենք տեսնում, որ նրանք ռազմագերիներին վերադարձնելու քաղաքականություն ունեն: Ես անձամբ չեմ տեսնում»:

Հարցին՝ ի՞նչով է դա պայմանավորված․ Ադրբեջանի քայլերի՞ց էին վախենում՝ Ալեքսանյանը պատասխանեց. «Չգիտեմ, դա երևի իրենք կասեն, բայց որ Ադրբեջանին  լիագույն խոնարհում ունեն՝ ակնհայտ է: Տեսնելով, թե Ալիևն ինչպես է խոսում, նվաստացնում այս իշխանություններին և երբեք պատասխան չի ստանում՝ չգիտեմ, թե դա ինչ է: Դա վախի հարց չէ, գուցե ինչ-որ շահե՞ր կան»: