Երեկ՝ հուլիսի 16-ին, "Hakobyan art gallery" պատկերասրահում տեղի ունեցավ 44-օրյա պատերազմի վիրավոր հերոս տղաների իրական պատմությունների հիման վրա գրված Մամիկոն Խուրշուդյանի հեղինակած "Հայրեններ" գրքի շնորհանդեսը։  Գրքի հերոսների հետ հեղինակը ծանոթացել է ռազմական հոսպիտալի վիրաբուժական բաժանմունքում։ 

2020 թվականի սեպտեմբերի 26-ի գիշերն էր․ ընկերոջս հետ քննարկում էինք առաջիկա միջոցառման մանրամասները․․․ Լուսադեմին բաժանվեցինք միմյանցից, հոգնածություն չէի զգում, բայց տուն հասնելս ու քնելս արագ ստացվեց․․․

27-ի առավոտյան 10-ին արթնացա ընկերոջս զանգից․

-Պատերազմ է սկսվել․․․

Սկսեցի հուզմունքս խեղդել բղավելով, վերլուծություններս ճիշտ էին դուրս եկել, ավելի շատ բղավում էի, որովհետև գիտակցում էի բոլոր դժվարությունները, գիտակցում էի, որ․․․․ բայց ներքին պայքարս չմարեց․․․

Արդեն երեկոյան մետ տասը ընկերներով վճռեցինք մեր անելիքները և անգամ պատերազմից հետո շարունակեցինք ամեն կերպ օգնություն ցույց տալ տուժածներին․․․ 

Ահա այսպիսին է գրքի առաջաբանը, որն ընթերցողին ամբողջովին փոխանցում է հեղինակի հույզերն ու ապրումները։ 

"Հայրեններ"-ը 44-օրյա պատերազմի հերոսներ Հրաչյա Խաչատրյանի, Միքայել Գրիգորյանի, Արամ Արզումանյանի, Վոլոդյա Աղասարյանի, Վադիմ Խաչատրյանի, Կարեն Խլոպուզյանի, Արթուր Պողոսյանի, Գոռ Հովհաննիսյանի, Սոս Մաթևոսյանի, Արայիկ Հակոբջանյանի, Կամո Գևորգյանի, Միքայել Սարգսյանի, Կարեն Գրիգորյանի, Գարիկ Հովհաննիսյանի, Դավիթ Հարությունյանի, Ռազմիկ Քամալյանի, Արամ Մաթևոսյանի, Արման Մովսիսյանի, Արշակ Ավագյանի և Նորայր Տոնոյանի պատերազմում ապրած ծանր ու հերոսական օրերի գրավոր վկան է, որը հեղինակ Մամիկոն Խուրշուդյանի ձեռամբ գրի է առնվել։ Այս գիրքը սերունդներին ժառանգվող անհերքելի փաստ է, որը պատմում է մեր տղաների պայքարի, ուժի, հավատքի, մահվան դեմ կռիվ տվող նրանց չհանձնվող տեսակի, կյանքին առավել ամուր թելերով կառչելու և վերածնվելու մասին։ 

NewsVoice.am-ը շնորհավորում է Մամիկոն Խուրշուդյանին այս հայրենանվեր գործը կյանքի կոչելու և մշտապես հերոսների կողքին լինելու համար։ 

Նյութը՝ Աննա Ավետիսյանի