Արցախի համար այսօր առաջնահերթությունը վաղվա օրվա վերաբերյալ համոզմունքն է, որը միայն եկեղեցին տալ չի կարող։ Ստեփանակերտում լրագրողների հետ զրույցում ասաց Արցախի թեմի առաջնորդ Տեր Վրթանես եպիսկոպոս Աբրահամյանը։

Արցախի հոգևոր առաջնորդի խոսքով՝ Արցախում նախ պետք է հզորացնել անվտանգությունը, ապա նոր զբաղվել հոգևոր և մշակութային կյանքի հարստացմամբ։

«Եկեղեցին միշտ ասում է՝ ամուր հոգևոր տան կողքին պետք է լինեն ամուր իշխանական տներ։ Իշխանական տներից մեկն էլ բանակն է։ Մեր հայրերը ի՞նչ են արել Կաչաղակաբերդում (բերդ Մարտակերտի շրջանում, պատերազմից հետո մնացել է հայկական վերահսկողության տակ. խմբ․)։ Նրանք այդտեղ նախ կառուցեցին բերդը, ապա կամուրջը, հետո նոր՝ եկեղեցին։ Նույն առաջնահերթությամբ էլ մենք պետք է շարժվենք», - ասաց Տեր Վրթանեսը։

Նրա խոսքով՝ Արցախի կարգավիճակի և վաղվա հարցը այժմ բոլոր արցախցիների համար առաջնայինն է։

«Իշխանությունների ամեն որոշում ուղիղ հետևանք է ունենում արցախցիների համար։ Եթե Արցախի ապագան, վաղվա օրը պարզ լինի, դու էլ հնարավորություն ունենաս, պետք է նոր եկեղեցիներ էլ կառուցես, իսկ ավելի լավ է՝ հները, որոնք խոնարհված վիճակում են, վերանորոգես։ Ես չեմ ասում, որ եկեղեցիներ պետք չէ վերանորոգել կամ հոգևոր կյանքը պետք է առանձնանա բանակից, հակառակը՝ աղոթող զինվորը աննկուն զինվոր է, մեր պապերը խաչերը ձեռքին են գնացել հայրենիքը պաշտպանելու։ Ու մենք էլ ասում ենք՝ հույսը առ Աստված երբեք չի ամաչեցնում, բայց այդ հույս ունեցողն էլ պետք է իր վաղվա, իր իշխանությունների որոշումների հանդեպ վստահություն ունենա», - ասաց Տեր Վրթանեսը։

Նշենք, որ Տեր Վրթանեսը երկար տարիներ եղել է ՀՀ զինված ուժերի հոգևոր առաջնորդը։ Նա Արցախի թեմի առաջնորդ է նշանակվել այս տարվա հունվարին՝ փոխարինելով Պարգև սրբազանին։