Հուլիսը Հայաստանում կլինի նույնքան շոգ, որքան եւ հունիսը։ Այս մասին հուլիսի 2-ին լրագրողների հետ հանդիպման ժամանակ ասել է երկրի գլխավոր օդերեւութաբան Գագիկ Սուրենյանը։

Նրա խոսքով՝ օդի միջին ամսական ջերմաստիճանը Հայաստանի ամբողջ տարածքում կգերազանցի նորմը 2-3 աստիճանով։

«Իրաքից հուլիսի 3-4-ին սպասվում է տաք օդային զանգվածների ներթափանցում։ Օդի ջերմաստիճանը Երեւանում, Արարատում եւ Սյունիքի հովիտներում կտրուկ կբարձրանա եւ կգրանցվի 40-41 աստիճանի մակարդակին։ Բայց արդեն հուլիսի 6-ից շոգը կնահանջի, եւ օդի ջերմաստիճանը կնվազի մինչեւ 35-36 աստիճան»,- նշել է Սուրենյանը։

Նա նաեւ տեղեկացրել է, որ հովիտներում, մասնավորապես՝ Արարատի մարզում եւ Երեւանում օդի ջերաստիճանը որոշ օրերի կբարձրանա եւ կհասնի 40-41 աստիճանի։

Այնուամենայնիվ, որոշ օրերի Սեւ ծովից սպասվում է սառը օդային զանգվածների ներթափանցում, ինչը կհանգեցնի համեմատական զովացման։

Ընդ որում՝ ժամանակ առ ժամանակ կլինեն անձրեւներ, բայց տեղումների քանակը կմնա նորմի սահմաններում։

«Որպես կանոն, հուլիսին այդ նորմը ցածր է՝ մեկ հորդառատ անձրեւ»,- ասել է երկրի գլխավոր օդերեւութաբանը։