ԵՐԵՎԱՆ, 3 փետրվարի – Sputnik. ՀՀ առողջապահության նախարարությունը, ազգային ծրագրով, անվճար դեղորայք է տրամադրում հեպատիտ C-ով վարավկաված պացիենտներին: Տեղեկությունը լրագրողներին ասուլիսի ժամանակ հայտնեց ՀՀ ԱՆ ինֆեկցիոն հիվանդությունների գծով խորհրդատու, «Ինֆեկցիոն հիվանդությունների ազգային կենտրոնի» տնօրենի տեղակալ Նարինե Սարգսյանցը։ Նրա խոսքով՝ աստիճանաբար ծրագրի շրջանակում բուժվողների թիվը պետք է ավելացնել:
«Ծրագիրը ենթադրում է դեղերի՝ ուղիղ ազդեցության հակավիրուսային պրեպարատների անվճար տրամադրում: Ներկայում անվճար տրամադրվում են այն պացիենտներին, որոնց առաջնահերթ է պետք բուժել, սակայն նախատեսում ենք ընդլայնել ու բուժել հեպատիտ C ունեցող բոլոր պացիենտներին: Պարզապես մենք պետք է ունենանք հստակ ախտորոշում»,-ասաց Նարինե Սարգսյանցը:
Բուժումը տևում է 12-24 շաբաթ՝ կախված հիվանդության բարդացումից։
Մինչ այս գործընթացն ազգային ծրագրում ընդգրկելը Հայաստանում այդ ուղղությամբ փորձնական ծրագիր է իրականացվել: Վրաստանի կառավարության աջակցությամբ Հայաստանին տրամադրվել է համապատասխան դեղորայք:
Հայկական լյարդաբանական ասոցիացիայի նախագահ, Ինֆեկցիոն հիվանդությունների ազգային կենտրոնի հեպատոլոգիական կլինիկայի ղեկավար Հասմիկ Ղազինյանը նշեց, որ այդ ծրագրի արդյունքները բավական դրական են եղել, գրանցվել է հեպատիտ C-ից առողջացում բուժվածների 97 տոկոսի մոտ:
«Վիրուսային հեպատիտիներն Առողջապահության համաշխարհային կազմակերպության գլոբալ խնդիրներից է, այն լուրջ մարտահրավեր է, հատկապես պանդեմիայի ժամանակահատվածում: Ցավոք, վիրուսային հեպատիտներով ինֆեկցվածների միայն 10 տոկոսն է իրազեկված»,-ասաց Հասմիկ Ղազինյանը:
Ենթադրվում է, որ Հայաստանում հեպատիտ C-ի տարածվածությունը կազմում է 4 տոկոս և այդ 4 տոկոսի 70 տոկոսն է, որ ունեն քրոնիկ վիրուս։ Ըստ Հայաստանի ռազմավարության ծրագրի` պետք է 2030 թվականին հասնել հիվանդությունների կտրուկ նվազեցման՝ էլիմինացիայի։
Նշենք, որ ողջ աշխարում ավելի քան 71 միլիոն մարդ ունի հեպատիտով քրոնիկ ինֆեկցիա, սակայն նրանցից միայն 20 տոկոսն է ախտորոշված։ Ենթադրվում է, որ Հայաստանում վարակվածների թիվը կազմում է 68000։
Ամբողջ աշխարհում տարեկան արձանագրվում են հեպտիտով վարակման ավելի քան 2 միլիոն նոր դեպք։
.png)
.png)