Հայաստանի եւ Վրաստանի հարաբերություններն իդեալական են, փոխգործակցության այնպիսի մակարդակ, ինչպիսին ներկայումս կա, դեռևս չի եղել։ Այս մասին Թբիլիսիում առևտրատնտեսական համագործակցության միջկառավարական հանձնաժողովի 11-րդ նիստի բացմանը, որին ներկա է ՀՀ վարչապետ Նիկոլ Փաշինյանը, հայտարարել է Վրաստանի վարչապետ Իրակլի Ղարիբաշվիլին։
«Դուք երկու անգամ եղել եք Վրաստանում, ես նույնքան` Հայաստանում։ Սա վկայում է մեր երկրների հարաբերությունների մակարդակի մասին։ Մեր նախաձեռնությամբ միջկառավարական հանձնաժողովի պայմանավորվածությունները տեղի են ունենում վարչապետների մակարդակով»,-ասել է Ղարիբաշվիլին։
Վրաստանի վարչապետն ընդգծել է, որ երկարամյա ընդմիջումից հետո նիստի անցկացումը հնարավոր է դարձել Փաշինյանի անձնական ավանդի շնորհիվ։ Ըստ նրա` Թբիլիսին շահագրգռված է երկու երկրների միջև առկա սերտ, բարեկամական համագործակցության վերաձևակերպմանը գործնականի:
«Մենք այսօր այստեղ ենք, որպեսզի մեր առևտրատնտեսական հարաբերություններն էլ ավելի ամրապնդենք, խոսենք տարածաշրջանային նախագծերի, ենթակառուցվածքների, այն ուղղությունների մասին, որոնք հետաքրքրում են մեր երկրներին»,-ասել է Ղարիբաշվիլին:
Վրաստանի վարչապետն ընդգծել է, որ հպարտությամբ կարող է հայտարարել, որ փոխգործակցության նման մակարդակ Հայաստանի հետ երբևէ դեռ չի եղել։ Եվ դա, նրա մեկնաբանությամբ, երկու երկրների գործող վարչապետների վաստակն է:
Ղարիբաշվիլին նաև նշել է, որ Թբիլիսին շահագրգռված է տարածաշրջանում խաղաղության ու կայունության հաստատմամբ:
Հիշեցնենք` առևտրատնտեսական համագործակցության միջկառավարական հանձնաժողովի տասնմեկերորդ նիստը պետք է կայանար Թբիլիսիում 2020 թվականին։ Սակայն համավարակի ու Արցախյան պատերազմի պատճառով հետաձգվել էր մեկ տարով։
Վերջին նիստը տեղի է ունեցել 2019 թվականին` 8-ամյա ընդմիջումից հետո, Հայաստանում։
Երևանյան նիստի ընթացքում հանգամանալից արձանագրվել էր գալիք տարվա գործողությունների ծրագիրը` հայ-վրացական հարաբերությունների համար փոխադարձ հետաքրքրություն ներկայացնող բոլոր ոլորտներում:
Հիշեցնենք, որ ՀՀ վարչապետ Նիկոլ Փաշինյանը Վրաստան էր մեկնել նաև ընթացիկ տարվա սեպտեմբերի 8-ին։ Թբիլիսիսում կայացել էր նրա ու Վրաստանի կառավարության ղեկավարի` Իրակլի Ղարիբաշվիլիի հանդիպումը։
.png)
.png)