Հայ և բելառուս ժողովուրդները եղբայրական ժողովուրդներ են, մենք շատ սերտ բարեկամական կապեր ունենք, և որևէ հայտարարություն չի կարող ազդել այդ ժողովուրդների բարեկամության վրա։ Այս մասին այսօր ԱԺ–ում, լրագրողների հետ ճեպազրույցում հայտարարեց ԱԺ փոխնախագահ Հակոբ Արշակյանը` մեկնաբանելով Բելառուսի նախագահ Ալեքսանդր Լուկաշենկոյի հայտարարությունը` Հայաստանի ապագայի վերաբերյալ։

ԱԺ փոխնախագահն ընդգծեց, որ համակարծիք է այսօր ԱԳՆ–ի տարածած հայտարարության հետ։

ԱԺ փոխնախագահը նաև վստահեցրեց, որ Հայաստանում որևէ միության միավորվելու հարց չի քննարկվում։

Հիշեցնենք, որ Բելառուսի նախագահ Ալեքսանդր Լուկաշենկոն Վլադիմիր Սոլովյովին տված հարցազրույցում, անդրադառնալով Ռուսաստան-Բելառուս միութենական պետության ստեղծման հարցին, մասնավորապես, նշել էր. «Դե, Հայաստանը գնալու տեղ չունի: Կարծում եք նրանք ինչ-որ մեկին պե՞տք են: Նրանք դա տեսան: Նիկոլ Վովաևիչը դա տեսավ»։

ՀՀ արտգործնախարարությունն այսօր անդրադարձել է Բելառուսի նախագահի՝ Հայաստանի վերաբերյալ աղմկահարույց հայտարարությանը։

Նշվել էր, որ Բելառուսի նախագահի աշխարհաքաղաքական ինքնատիպ վերլուծությունները նպատակ ունեն սպասարկելու առաջին հերթին սեփական ներքին քաղաքական օրակարգը և որևէ առնչություն չունեն Հայաստանի և նրա արտաքին քաղաքականության հետ։