ՀՀ ԿԳՄՍ նախարարության աջակցությամբ մայիսի 30-ից հունիսի 15-ը Երևանում, Գյումրիում և Արտաշատում իր աշխատանքներն է շարունակում «Արմմոնո» 19-րդ» միջազգային թատերական փառատոնը։

«Արմմոնո» միջազգային թատերական փառատոնն իր գոյության մեկ ու կես տասնյակից ավելի տարիների ընթացքում կարողացավ մեր երկրում ձևավորել ու զարգացնել «մեկ դերասանի թատրոն»-ը: Փառատոնի տնօրեն Մարիաննա Մխիթարյանի փոխանցմամբ` «Արմմոնո»-ն տարեցտարի ընդլայնում է իր շրջանակները՝ ի հայտ բերելով նոր անուններ ու հնարավորություն տալով հայ հանդիսատեսին ծանոթանալու միջազգային թատերական իրողություններին:

Տիկին Մխիթարյանը նշում է, որ ցավոք, այս տարի ևս, համավարակով պայմանավորված, փառատոնն արտերկրից դերասաններ չհյուրընկալեց, սակայն առցանց տիրույթում ակտիվ է. առցանց իրենց աշխատանքները կներկայացնեն դերասաններ  ՌԴ-ից, Ղազախստանից, Բելառուսից և Իսրայելից:  

Մ. Մխիթարյանը շեշտեց, որ այս տարի «Արմմոնո» փառատոնը ուշադրությունը բևեռել է բացառապես հայ հեղինակների գործերի վրա, աշխատանքներ է տանում Հայաստանի մարզային թատրոնների հետ՝ մոնոներկայացումների զարգացման ուղղությամբ, ինչպես նաև հարթակ է տրամադրում երիտասարդ դերասաններին ու բեմադրիչներին ինքնաարտահայտվելու համար։  

«Արմմոնո-Plus» - ծրագրի շրջանակում կցուցադրվեն մոնոներկայացումներ մարզային թատրոնների դերասանների կատարմամբ, և 19-րդ «Արմմոնոն» հյուրընկալվեց Գյումրիում և Արտաշատում։

«Արմմոնո»-ի շրջանակներում կանցկացվեն թատերականացված ընթերցումներ՝ «Դրամատուրգիա» հանդեսի և tatron-drama.am կայքի հետ համատեղ։ Առաջին անգամ, հայ դրամատուրգներն իրենց մասնակցությունը կբերեն փառատոնին երկու ծրագրով՝ «Պատմություններ պատերազմի մասին» և «Պատմություններ սիրո մասին»։