Արցախի դատախազությունը հայտնում է, որ օրեր առաջ ադրբեջանական մարտական դիրքից կրակել են քարամշակման կետում աշխատող բանվորների վրա։ Նշվում է, որ դեպքը տեղի է ունեցել փետրվարի 5-ին` ժամը 12:00-ի սահմաններում։
«Ասկերանի մերձակայքում գտնվող «Օղտեն մաշկ» կոչվող տեղամասում տեղակայված ադրբեջանական դիրքից խոշոր տրամաչափի գնդացիրով մի քանի կրակահերթ է արձակվել Ասկերանի Խրամորթ գյուղի վարչական տարածքում գործող՝ «Ապագա սերունդների հիմնադրամ» ՍՊ ընկերության քարամշակման կետի բանվորներ Գ.Բ.-ի, Ա.Թ.-ի և Ա.Հ.-ի ուղղությամբ։ Նրանք տվյալ պահին տրակտորի վերանորոգման աշխատանքներ էին կատարում»,– նշված է դատախազության հաղորդագրության մեջ։
Կրակոցներից պաշտպանվելու նպատակով, մինչև ոստիկանության աշխատակիցների ժամանելը, վերջիններս շուրջ 2 ժամ ստիպված թաքնված են մնացել։ Այդ ընթացքում նրանք զանգել և դեպքի մասին իրազեկել են իրենց տնօրինությանը: Դեպքի հանգամանքները պարզելու նպատակով ԱՀ ոստիկանությունը ձեռնարկում է քրեադատավարական միջոցառումներ:
.png)
.png)